الخيانة شئ مرفوض سواء من الرجل او المرأه و من اكبر العوامل القاتله للأمان وبالتالى للحب، رد فعل الجنسين للخيانة دلوقتى واحد مع بعض الاختلافات يعنى هتلاقى الرجاله بيقولوا هسيبها لأنها متستهلش حتى انى ادخل السجن عشانها و لو دمه حامى شويه هيقتلها.
اما الزهريات برده هتسيبه بس لأنه مايستهلهاش و لو رومانسيه شويه هتقتل نفسها؛ بس هنسأل سؤال ايه هى حدود الخيانه؟؟ هل بالضرورة علاقه ولا النظره خيانة؟؟
النظره خيانة لأن النظره دى من حقى انا مش من حق حد غيرى و لأن شريك حياتك مابقاش ملك نفسه بقى ملكك انت ولأن " قلبك معدش ملكك مادام عشقتك" يبقى حتى كلامك مع حد تانى كصديق خيانه؟؟ بصوا هنا هنلاقى اختلافات بس مش حسب راجل و ست انما حسب التربيه؛ هنلاقى ناس ده عندها عادى و ناس لأ.
أغرب شئ سمعته من كذا بنت " و ايه يعنى لما يعرف واحده تانيه طالما مش مقصر فى حقى" و هنا يجيلى سؤال طب ليه واحده غيرك تسمع بحبك ووحشتينى ؟؟
لما تحصل خيانه الفراق هو الحل الا من رحمه ربه و فكر شويه قبل هدم البيت بس الحياة ممكن تمشى لو اللى خان الراجل انما استحاله تمشى لو كانت البنت.
النهارده مفيش حلول بس فى سؤال مهم ايه يخلى حد يخون و اتفقنا حتى بالنظره او بالكلام؟؟
ممكن اهمال الطرف الاخر، عدم تقدير، عدم القدرة على سماع مشاكله، حاجات كتير اوى وبتفرق من شخص للتانى وده سؤال لازم نجاوبه جوانا ولازم يتقال اجابته للطرف التانى علشان ميستغربش لما تحصل خيانة.
المشكلة دى بالذات بتظهر لنا ان لكل شئ وجهان و طالما المشكلة بين اتنين يبقى اكيد الاتنين غلطانين الا لو كان عينه او عينها زايغه ساعتها ميتبكيش عليه او عليها.
و فى الختام هنقول القط مبيحبش الا خنّاقه .... و هستنى تقولولى نحب نتكلم فى ايه الاسبوع الجاى؟